صدر عارف علوی کی نو منتخب امریکی ہم منصب کو مبارک باد

اسلام آباد(دھرتی نیوز) صدر مملکت ڈاکٹر عارف علوی نے نو منتخب امریکی صدر جو بائیڈن کو مبارک باد دی ہے۔

تفصیلات کے مطابق سماجی رابطے کی ویب سائٹ ٹوئٹر پر جاری اپنے بیان میں صدر مملکت نے کہا میں نو منتخب صدر جو بائیڈن اور نائب صدر کمالہ ہیرس کو مبارک باد پیش کرتا ہوں۔

صدر عارف علوی نے کہا میں عالمی امن بالخصوص افغانستان اور اس پورے خطے میں امن کے لیے بہتر امریکی کردار کا منتظر ہوں، پاکستان امریکا سے طویل مدتی دوستی اور باوقار تعلقات کا خواہاں ہے۔

گزشتہ روز وزیر اعظم عمران خان نے بھی جوبائیڈن کو امریکی صدر منتخب ہونے پر مبارک باد دی تھی اور اپنے پیغام میں انھوں نے کہا میں جوبائیڈن کی طرف سے جمہوریت سے متعلق عالمی اجلاس کا منتظر ہوں، ٹیکس چوری، ملکی دولت لوٹنے والوں کے خلاف مل کر کام کریں گے، افغانستان اور خطے میں امن کے لیے بھی مل کر کام کریں گے۔

امریکی میڈیا کے مطابق جوبائیڈن اپنے حریف ڈونلڈ ٹرمپ کو شکست دے کر امریکی صدر متنخب ہوگئے ہیں، نو منتخب صدر جوبائیڈن نے ٹرمپ کے 214 ووٹس کے مقابلے میں 290 الیکٹورل ووٹ حاصل کیے ہیں، جوبائیڈن جنوری 2021 میں امریکی صدر کے عہدے کا حلف اٹھائیں گے۔

Congratulations President Elect @JoeBiden and VP Elect @KamalaHarris Looking forward to an improving US role towards world peace specially in Afghanistan, as well as the entire region. Pakistan looks forward to our continued long term friendship and a dignified relationship.

— Dr. Arif Alvi (@ArifAlvi) November 7, 2020