کرونا ویکسین: جاپان کا عوام کے لیے بڑا اعلان

ٹوکیو:(دھرتی نیوز ڈیسک) جاپان نے عوام کو کرونا ویکسین مفت دینے کا اعلان کر دیا ہے۔

غیر ملکی میڈیا کے مطابق جاپان میں عوام کو کرونا ویکسین کی مفت فراہمی کے لیے آج ایک بل منظور کر لیا گیا ہے، جس کی منظوری کے بعد اب جاپانی عوام کو ویکسین مفت ملے گی۔

جاپان نے امریکی کمپنی موڈرنا، آسٹرازینیکا اور فائزر سے ویکسینز کا معاہدہ کیا ہے۔ واضح رہے کہ جاپان میں اب تک 2 ہزار سے زیادہ افراد کرونا وائرس سے ہلاک ہو چکے ہیں جب کہ ایک لاکھ 48 ہزار متاثر ہوئے۔

بل میں کہا گیا ہے کہ حکومت جاپان کے 126 ملین باشندوں کے لیے ویکسین کے تمام اخراجات اٹھائے گی، اسے پارلیمنٹ کے ایوان بالا نے منظور کیا۔

 جاپان نے فائزر سے 6 کروڑ لوگوں کے لیے ویکسین کا معاہدہ کیا ہے، موڈرنا بائیوٹیک فرم سے ڈھائی کروڑ لوگوں جب کہ آسٹرا زینیکا سے 12 کروڑ لوگوں کے لیے ویکسین کا معاہدہ کیا ہے۔

واضح رہے کہ فائزر اور موڈرنا کمپنیاں امریکا اور یورپ میں کرونا ویکسین کے ہنگامی استعمال کی منظوری کی کوششیں کر رہی ہیں۔

ادھر آج برطانیہ دنیا کا پہلا ملک بنا گیا ہے جس نے کرونا ویکسین کے وسیع پیمانے پر استعمال کی باقاعدہ منظوری دے دی ہے، برطانوی وزیر صحت نے ایک بیان میں کہا کہ آئندہ ہفتے سے ویکسین دستیاب ہونا شروع ہوگی۔