آن لائن بلاگنگ سے پیسے کیسے کماتے ہیں؟

اکثر اوقات دوستوں کے سوالات موصول ہوتے ہیں جن میں دوست سوال پوچھتے رہتے ہیں کہ آن لائن کمائی کیسے کی جا سکتی ہے، بہت سارے دوست آن لائن کمائی کرنے کے چکر میں جو ان کے پاس ہوتا ہے وہ بھی گنوا بیٹھتے ہیں اور پھر الزام دیتے ہیں ان لوگوں کو جنہوں نے انہیں آن لائن کمائی کے بارے میں تھوڑا بہت بتایا ہوتا ہے۔
ایسا عموما تب ہوتا ہے جب کوئی دوست نیا نیا انٹرنیٹ کی دنیا میں داخل ہوتا ہے اور آتے ہی آن لائن کمائی کرنے کے چکر میں‌پڑ جاتا ہے بلکہ اگر یوں کہا جائے کہ وہ انٹرنیٹ بلاگنگ کی طرف آتا ہی اس لئے ہے کہ وہ آن لائن کمائی کر سکے تو غلط نہ ہو گا۔
ذیل کے مضمون میں کوشش کی جائے گی کہ دوستوں کے آن لائن بلاگنگ کے ذریعے کمائی کے چند طریقوں سے آگاہی دی جائے اگرچہ یہ مکمل احاطہ تو نہیں ہو گا لیکن پھر بھی اس مضمون کو پڑھنے کے بعد آپ لوگ کچھ نہ کچھ اس بارے میں جان ضرور جائیں گے۔
سب سے پہلی بات تو یہ ذہن میں رکھیں کہ جس طرح عام زندگی میں پیسے کمانا آسان نہیں ہے اسی طرح آن لائن پیسے کمانا بھی بالکل آسان نہیں ہے، جو شخص آپ کو یہ سمجھانے کی کوشش کرے کہ آن لائن پیسے کمانا بہت آسان ہے تو سمجھ لیں کہ وہ بالکل جھوٹا ہے اور آپ کی محنت اور پیسہ برباد کروانے کے علاوہ آپ کے اور کسی کام نہیں آ سکتا ہے۔
انٹرنیٹ سے پیسے کمانے کے خواہشمند افراد کی اکثریت کو شروع میں پیسے کمانے کے لئے ایڈ کلک، ایڈ پوسٹنگ اور اسی طرح کے دوسرے طریقوں کے بارے میں بتایا جاتا ہے اور اگر کسی نے اپنی کوئی چھوٹی موٹی ویب سائیٹ بنا رکھی ہے تو اسے مشورہ دیا جاتا ہے کہ وہ اپنی ویب سائیٹ پر گوگل ایڈز لگائے اور مختلف طریقوں سے ان ایڈز پر کلک کروائے اور پیسے کمائے۔ یاد رہے ایسے تمام طریقے بالکل غلط اور جھوٹ پر مبنی ہیں اور ان طریقوں سے نہ صرف کوئی دیرپا کمائی نہیں ہو سکتی ہے بلکہ آپ کی ویب سائیٹ پر پابندی بھی لگ سکتی ہے، آئے دن مختلف قسم کی ویب سائیٹس ایسے دعوؤں کے ساتھ منظرِ عام پر آتی رہتی ہیں جن پر صارفین کو رجسٹریشن حاصل کرنے کے بعد کمائی کا جھانسا دیا جاتا ہے بلکہ بعض تو روزانہ چند گھنٹے کام کرنے پر سو ڈالر سے لے کر ہزار ڈالر تک کی آمدن کے وعدے کرتی نظر آتی ہیں، ایسی اکثر ویب سائیٹ پر رجسٹریشن فیس ادا کرنا پڑتی ہے اور پھر وہ اپنے صارفین کو مختلف ٹاسک دیتے ہیں جنہیں پورا کرنے پر کمائی ہوتی ہے یہ ٹاسک ہمیشہ کچھ لنکس کھولنے، کچھ ایڈز پوسٹ کرنے یا کچھ ویب سائیٹس پر کچھ لکھنے کے متعلق ہوتے ہیں، ان ویب سائیٹس کے مالکان کو دہری کمائی ہوتی ہے ایک تو صارفین سے رجسٹریشن فیس کی وصولی اور اس کے بعد یہ ایک پورا نیٹ ورک چلاتے ہیں جو عموما فیک ایڈ پوسٹ یا ایڈ کلک کرواتے ہیں جن سے انہیں تو آمدن ہونے کی توقع ہوتی ہے لیکن چند دن یا چند ہفتے بعد یہ ویب سائیٹس بند ہو جاتی ہیں جس سے صارفین کی نہ صرف اصل کمائی لٹ جاتی ہے بلکہ اگر انہوں نے اس ویب سائیٹ کے ڈیش بورڈ پر چند ڈالر کما بھی لیئے ہوتے ہیں تو ان تک بھی رسائی ختم ہو جاتی ہے۔ اس لئے سب سے پہلی اور بنیادی بات تو یہ ذہن میں رکھیں کہ اس طرح کمائی کا کوئی طریقہ نہیں ہے اور سراسر اپنی محنت اور روپے کی بربادی کا ذریعہ ہے۔

آن لائن پیسے کمانے کے چند اصلی طریقے