برطانیہ سے آنے والی دو بہنوں کی لاشیں برآمد

گجرات میں گھر سے برطانیہ سے آنے والی دو بہنوں کی لاشیں برآمد ہوئی ہیں۔

اہلخانہ کا مؤقف ہے کہ لڑکیوں کی موت گیس لیک ہونے کے باعث دم گھٹنے سے ہوئی۔

عبدالرحمان نامی شخص اپنے اہل خانہ کے ہمراہ برطانیہ سے کچھ دنوں پہلے ہی گجرات کے گاؤں منڈی میرپور آیا تھا۔

اہل خانہ نے دعویٰ کیا ہے کہ یہ واقعہ 12 جنوری کو پیش آیا، 25 سالہ ماریہ اور 19 سالہ نادیہ نہانے کیلئے گئی تھیں، گیزر کی گیس لیک اور دم گھٹنے سے دونوں بہنیں جاں بحق ہوگئیں۔

پولیس نے اہل خانہ کے بیانات قلمبند کرلیے ہیں اور ابتدائی تفتیش کے بعد دونوں کی تدفین کردی گئی ہے۔

تھانہ دولت نگر پولیس نے لاشوں کے نمونے لیبارٹری ٹیسٹ کیلئے لاہور بھجوادیے ہیں۔

پولیس کا کہنا ہے کہ واقعہ کا مقدمہ درج کرلیا گیا ہے، رپورٹ آنے پر مزید قانونی کارروائی کی جائے گی۔