پلاسٹک بیگز کے استعمال پر پابندی : لاہور ہائیکورٹ کا تحریری حکم جاری

لاہور: لاہور ہائی کورٹ نے پلاسٹک بیگز کے استعمال پر پابندی لگانے کا تحریری حکم جاری کر دیا جس میں کہا گیا ہے کہ پنجاب کے تمام بڑے ڈیپارٹمنٹل اسٹور پلاسٹک بیگ کا استعمال ترک کر دیں۔

تفصیلات کے مطابق لاہور ہائی کورٹ کے جسٹس شاہد کریم نے 7 صفحات پر مشتمل تحریری حکم جاری کیا ہے، تحریری حکم میں کہا گیا ہے کہ پنجاب کے تمام بڑے ڈیپارٹمنٹل اسٹور پلاسٹک بیگ کا استعمال ترک کر دیں، اس کے علاوہ  اسٹورز ، مالکان اور ہول سیلرز  دو ہفتے میں پلاسٹک بیگز کے متبادل انتظامات کریں۔

لاہور ہائی کورٹ کے تحریری حکم میں کہا گیا ہے کہ محکمہ تحفظ ماحول عدالتی حکم سے آگاہ کر کے عملدرآمد رپورٹ پیش کرے، صارفین کے لیے عدالتی حکم بڑے اسٹورز پرنمایاں جگہ پر آویزاں کرنے کا حکم دیا گیا ہے۔

عدالتی حکم نامے میں کہا گیا ہے کہ پلاسٹک بیگز ماحولیاتی آلودگی میں اضافے کا بڑا سبب ہیں، پلاسٹک بیگز پر پابندی عائد کرنا لازم ہے، پلاسٹک بیگز پر پابندی کے لیے تمام اسٹیک ہولڈرز سے میٹنگز ہو چکی ہیں۔

یاد رہے کہ گزشتہ سال اگست میں وزیرمملکت ماحولیات زرتاج گل کا کہنا تھا کہ پاکستان کوپلاسٹک بیگ فری بنانے کا خواب پورا کریں گے، کسی کا کاروبارختم نہیں کرنے کا ارادہ نہیں ماحول ٹھیک کرنا ہے۔