فرانس میں وبا کی تیسری لہر میں شدت، پیرس سمیت سولہ اضلاع میں لاک ڈاؤن

پیرس(دھرتی نیوز انٹرنیشنل ڈیسک) فرانس میں وبا کی تیسری لہر میں شدت ، دارالحکومت پیرس اور سولہ اضلاع میں ایک ماہ کیلئے لاک ڈاؤن نافذ کر دیا گیا ۔

لاک ڈاؤن سے متاثرہ شہروں میں یونیورسیٹیاں ، اسکول اور کالجز کھلے رہیں گے ، تمام سیاحتی مقامات بند رہیں گے ، سماجی تقاریب پر مکمل پابندی ہوگی ، ریسٹورینٹ ، کیفے ، جمنا زیم اور سوئمنگ پولز بھی بند رہیں گے ، شہریوں کو ضروری سفر کیلئے اجازت نامہ دکھا کر رہائش سے دس کلومیٹر تک سفر کرنے کی اجازت ہوگی ، فرانس میں اب تک پچپن لاکھ افراد کو ویکسین لگائی جا چکی ہے ۔

دوسری جانب دنیا بھر میں عالمی وبا سے 27 لاکھ 3 ہزار سے زائد افراد لقمہ اجل بن چکے ہیں جبکہ متاثرہ افراد کی تعداد 12 کروڑ 23 لاکھ 55 ہزار سے بڑھ گئی ۔

 انگلینڈ میں موسم سرما کے لاک ڈاؤن میں تاخیر کرنے سے 27 ہزار اضافی اموات ہوئیں ۔ برطانوی تھنک ٹینک نے لاک ڈاؤن کا آغاز کرنے میں تاخیر کرنے کو برطانوی حکومت کی بہت بڑی غلطی قرار دیا ہے ۔

اقوام متحدہ کا کہنا ہے وقت کے ساتھ عالمی وبا نزلہ ، زکام کی طرح موسمی بیماری بن جائے گا ۔ ماہرین صحت کا کہنا ہے کہ وبا طویل مدت تک دنیا میں رہے گا ۔

ادھر امریکا کا ایسٹرازینیکا ویکسین کی 40 لاکھ خوراکیں میکسیکو اور کینیڈا بھیجنے کا منصوبہ ۔

واضح رہے کہ پاکستان میں وبا کے مثبت کیسز کی شرح 8 فیصد ہوگئی ، 24 گھنٹے کے دوران 3 ہزار 459 نئے کیسز رپورٹ ہوئے جبکہ وبا سے مزید 40 افراد دم توڑ گئے ۔ اموات کی مجموعی تعداد 13 ہزار 757 ہو گئی ۔

 ملک میں ویکسینیشن کے لیے 8 لاکھ افراد نے رجسٹریشن کرائی ، رجسٹرڈ ہونے والوں میں ہیلتھ ورکرز اور 60 سال سے زائد عمر کے افراد شامل ہیں ۔

این سی او سی کی رپورٹ کے مطابق لاہور کے 30 میں سے 28 علاقوں کے سیوریج نمونوں میں وبا کی موجودگی کا انکشاف ہوا ۔