لاہور ایئرپورٹ پر مسافر سے پستول کی گولیاں برآمد

لاہور: علامہ اقبال انٹرنیشنل ایئرپورٹ پر مسافر سے پستول کی 21 گولیاں اور میگزین برآمد کر لیا گیا۔

تفصیلات کے مطابق لاہور ایئرپورٹ پر مسافر سے پستول کا میگزین اور 21 گولیاں برآمد کر لی گئیں، مسافر حسن محمود بٹ پی کے 263 سے ابوظہبی جا رہا تھا، مسافر نے غلطی سے اسلحہ بیگ میں لانے کا اعتراف کیا۔

اے ایس ایف ذرائع کے مطابق تحریری معافی پر مسافر کو ابوظہبی سفر کی اجازت دے دی گئی، مسافر کے پاس اسلحے کا لائسنس موجود تھا، اسلحہ ضبط کر لیا گیا۔

یاد رہے کہ گزشتہ ماہ 13 جنوری کو علامہ اقبال انٹرنیشنل ایئرپورٹ پر تعینات سیکورٹی اہلکاروں نے خاتون مسافر کے سامان سے پستول کی گولیاں برآمد کی تھیں۔

ایئرپورٹ سیکورٹی فورس کے مطابق نجی ایئرلائن کی پرواز سے جدہ جانے والی خاتون کا کہنا تھا کہ وہ بیگ ان کے بھائی کا ہے جس کے پاس نائن ایم ایم پستول کا لائسنس بھی ہے، غلطی سے گولیاں اس بیگ میں رہ گئی ہیں۔