امدادی سامان دیتے وقت فوٹو سیشن پر پابندی ہوگی،وزیراعظم آزاد کشمیر

مظفرآباد: وزیراعظم آزاد کشمیر راجہ فاروق حیدر نے جعلی سینیٹائزر اور ماسک بنانے والوں کے خلاف کارروائی کا حکم دے دیا۔

تفصیلات کے مطابق مظفرآباد میں وزیراعظم آزاد کشمیر راجہ فاروق حیدر کی زیرصدارت اجلاس ہوا جس میں وزرا، چیف سیکرٹری، کمشنرز نے ویڈیو لنک کے ذریعے شرکت کی۔

اس موقع پر وزیراعظم آزاد کشمیر کا کہنا تھا کہ ذخیرہ اندوزی کرنے والوں کے خلاف کارروائی کی جائے۔انہوں نے بتایا کہ آزاد کشمیر میں تمام مریضوں کی حالت تسلی بخش ہے۔

راجہ فاروق حیدر نے امدا دی سامان دیتےوقت فوٹوسیشن پر پابندی کرتے ہوئے جعلی سینیٹائزر اور ماسک بنانے والوں کے خلاف کارروائی کا حکم بھی دیا۔وزیراعظم آزاد کشمیر کا مزید کہنا تھا کہ ڈاکٹرز اور پیرامیڈیکل اسٹاف کے سامان میں کمی نہیں آنے دیں گے۔

واضح رہے کہ پاکستان میں کورونا وائرس کے مریضوں کی تعداد 4000 سے تجاوز کرگئی جبکہ وائرس سے اموات 54 تک پہنچ گئیں۔

اعدادو شمار میں بتایا گیا کہ وفاقی دارلحکومت میں کرونا وائرس کے 83 کیس رپورٹ ہوئے ، پنجاب میں کرونا کے مریضوں کی تعداد 2004،سندھ میں932، کے پی میں 500،بلوچستان میں 202 ، گلگت بلتستان میں211 اور آزاد کشمیر میں 18 ہوگئی۔