ترنول سے اغوا کیا گیا 2 سال کا حسن بحفاظت بازیاب، ایک ملزم گرفتار

اسلام آباد: پنجاب کے شہر ترنول سے اغوا کیا گیا 2 سال کا بچہ حسن بحفاظت بازیاب کرا لیا گیا۔

تفصیلات کے مطابق پولیس نے ترنول کے علاقے سے اغوا ہونے والا حسن نامی دو سالہ بچہ بحفاظت بازیاب کرا لیا، پولیس نے جدید ٹیکنالوجی اور دیگر ذرایع کی مدد سے ایک ملزم اختر کو بھی گرفتار کر لیا ہے۔

پولیس کا کہنا ہے کہ دو سالہ بچے کو مسمات بی بی نامی خاتون نے اپنے ساتھیوں کے ساتھ اغوا کیا تھا، بچے کے والد خان شیریں نے اغوا کی اطلاع دے کر دعویٰ کیا تھا کہ مسمات بی بی نامی خاتون نے ساتھیوں کے ساتھ میرے بیٹے کو اغوا کیا۔

پولیس کے مطابق ایس پی صدر عمر خان کی ہدایت پر ملزمان کے خلاف اغوا کا مقدمہ درج کر کے بچے کی تلاش فوری طور پر شروع کر دی گئی تھی، ڈی ایس پی کی نگرانی میں ترنول پولیس ٹیم نے مختلف مقامات پر چھاپے مارے اور ملزم اختر کو گرفتار کرنے میں کامیاب ہو گئی۔

بچے کی بازیابی کے بعد پولیس نے دو سالہ بچہ والدین کے حوالے کر دیا، آئی جی اسلام آباد نے پولیس ٹیم کو کامیاب کارروائی پر شاباش بھی دی۔

یاد رہے کہ یکم فروری کو خیبر پختون خوا کے شہر پشاور میں بھی پولیس نے اغوا برائے تاوان کے ملزم حسنین کو گرفتار کر کے مغوی بچے کو بازیاب کرا لیا تھا، دوسری جماعت کا طالب علم 7 سالہ کاشان کو گھر کے باہر سے اغوا کیا گیا تھا، ملزم نے بچے کی رہائی کے لیے اس کے چچا سے 7 لاکھ روپے تاوان مانگا تھا، تاہم پولیس نے فون کال ٹریس کر کے اغوا میں ملوث 2 مرد اور 4 خواتین کو گرفتار کر لیا۔