ون فائیو پر جھوٹی کال کرنے والا شہری مشکل میں پھنس گیا

راولپنڈی: ریسکیو ون فائیو پر بچوں کے زخمی ہونے سے متعلق جھوٹی کال کرنے والا شہری مشکل میں پھنس گیا، پولیس نے جھوٹی کال کرنے والے کے خلاف مقدمہ درج کر لیا۔

تفصیلات کے مطابق راولپنڈی پولیس نے ریسکیو 15 پر جھوٹی کال کرنے والے شہری کے خلاف ٹیلی گراف ایکٹ کے تحت تھانے میں ایف آئی آر کاٹ دی۔

مقدمے میں کہا گیا ہے کہ ملزم نے پنڈی کے ایک تعلیمی ادارے میں 2 بچوں کے زخمی ہونے کی اطلاع دی تھی، جب پولیس موقع پر پہنچی تو ایسا کوئی واقعہ پیش ہی نہیں آیا تھا، ملزم نے سرکاری محکمے اور وسائل کا ضیاع کرایا۔

خیال رہے کہ گزشتہ برس اپریل میں پنجاب سیف سٹی اتھارٹیز نے ایک سال کی رپورٹ جاری کرتے ہوئے انکشاف کیا تھا کہ ون فائیو ایمرجنسی کال سروس پر شہریوں نے 71 فی صد جعلی کالز کیں، جس کی وجہ سے محکمہ پولیس مذاق بن گیا، دوسری طرف جعلی کالز کی وجہ سے محکمے کا قیمتی وقت اور وسائل بھی ضایع ہوئے۔ رپورٹ میں بتایا گیا تھا کہ مجموعی طور پر 43 لاکھ 45 ہزار سے زائد کالیں کی گئیں جن میں سے 30 لاکھ 87 ہزار کے قریب کالیں جعلی اور جھوٹی تھیں۔

گزشتہ برس کراچی میں بھی ایک شہری ڈاکٹر نعمان کو ون فائیو پر جھوٹی کال کرنے پر ٹیپو سلطان پولیس نے گرفتار کر لیا تھا، شہری نے پولیس کو ایک بس میں بم کی جھوٹی اطلاع دے دی تھی، معلوم ہوا کہ اس کا سامان بس میں رہ گیا تھا، جس پر اس نے یہ ‘تدبیر’ اختیار کی۔

پولیس کا کہنا ہے کہ شہری ایمرجنسی سروس کی اہمیت کو سمجھیں، اور اپنی ذمہ داری کا ادراک کریں، کیوں یہ سروس ان کے لیے ہی لائی گئی ہے۔