پی ایس ایل ترانے پر تنقید کے بعد عدنان صدیقی اور فیصل قریشی کی نصیبو لال کی حمایت
رواں ماہ 20 فروری سے شروع ہونے والے پاکستان سپر لیگ (پی ایس ایل) کے چھٹے سیزن کا آفیشل گیت ’گروو میرا‘ گزشتہ ہفتے ریلیز کیا گیا تو اکثر شائقین اس پر برہم نظر آئے۔
4 منٹ کے دورانیے پر مشتمل پی ایس ایل 6 کے آفیشل گانے کی ویڈیو 6 فروری کو ریلیز کی گئی تھی، جو دیکھتے ہی وائرل ہوگئی۔
رواں برس پی ایس ایل کا ترانہ لیجنڈ گلوکارہ نصیبو لال اور آئمہ بیگ نے گایا ہے اور نوجوان نسل میں کھیل اور گانوں کی مقبولیت کو مدنظر رکھتے ہوئے اس میں ہپ ہاپ بینڈ ینگ اسٹنرز کے ارکان کو بھی شامل کیا گیا ہے۔
گزشتہ برس پی ایس ایل فائیو کے گانے ’تیار ہیں‘ کو بھی تنقید کا نشانہ بنایا گیا تھا لیکن نصیبو لال اور آئمہ بیگ کے گانے ’گروو میرا‘ کو سننے کے بعد اکثر مداحوں کو پچھلے سیزن کا گانا بہتر لگنے لگا۔
جس کے بعد سوشل میڈیا پر پی ایس ایل سے متعلق مختلف ہیش ٹیگز بھی ٹرینڈ کررہے تھے اور صارفین کی بڑی تعداد نے تنقید کی تاہم بعدازاں اس گانے پر ملے جلے ردعمل کا اظہار کیا گیا۔
سوشل میڈیا صارفین کی تنقید کے بعد شوبز شخصیات کی جانب سے اس پر ردعمل دیا جارہا ہے اور اب بھی نامور اداکاروں عدنان صدیقی اور فیصل قریشی نے لیجنڈ گلوکارہ نصیبو لال کی حمایت کی ہے۔
اداکار فیصل قریشی نے ٹوئٹ کی کہ ہم کب چیزوں کو اس کے تناظر میں رکھنا اور اس کے مطابق ردعمل ظاہر کرنا سیکھیں گے؟
یہ بھی پڑھیں: پی ایس ایل 6: کا آفیشل گیت ’گروو میرا‘ریلیز
انہوں نے لکھا کہ گانے پر نفرت دکھائی جارہی ہے؟ اسپورٹس کا جذبہ دکھائیں اور چھوٹی چھوٹی چیزوں کی خوشی منائیں۔
فیصل قریشی نے کہا کہ میرا ذاتی خیال ہے کہ نصیبو لال جو عوام میں بہت مقبول ہیں وہ اپنے ‘گروو’ اور اونچے سُروں سے اسٹیڈیم میں چھا جائیں گی۔
When will we learn to take things in perspective and react accordingly . Song getting hate ? Lets go with the spirit of sports and celebrate little things . I personally think Naseebo Lal who is very popular with masses will Rock the stadium with her ‘groove’ and high notes .
— Faysal Quraishi (@faysalquraishi) February 11, 2021
دوسری جانب عدنان صدیقی نے اپنی ٹوئٹ میں کہا کہ ہم فنکاروں کے لیے کم از کم جو کرسکتے ہیں وہ یہ ہے کہ ان کا احترام کیا جائے۔
انہوں نے لکھا کہ کی بورڈ کا استعمال کرکے تنقید کرنا اور کسی کی محنت کے ٹکڑے ٹکڑے کردینا بہت آسان ہے۔
عدنان صدیقی کا کہنا تھا کہ کیسے نصیبو لال کے گائے ہوئے گانے بھول گئے جو انہوں نے ہمیں دیے، ‘گروو میرا’ اس طرح تنقید کا مستحق نہیں۔
Least we can do for our artists is respect them. It’s very easy to be keyboard warriors and shred someone’s hard work to pieces. How ungrateful to forget so conveniently all the melodious songs Naseebo Lal has given us. #groovemera doesn’t deserve to be trolled like this🙏🏽
— Adnan Siddiqui (@adnanactor) February 10, 2021
Facebook Comments