اقبال پارک میں لڑکی کی بے حرمتی پر شہباز شریف اور بلاول کی مذمت

14 اگست کو مینارِ پاکستان پر سیکڑوں افراد کا اکیلی لڑکی کو ہراساں کرنے اور تشدد کے واقعے پر شہباز شریف اور بلاول بھٹو زرداری نے شدید مذمت کی ہے۔

شہباز شریف نے کہا کہ وہ اس واقعے پر صدمے سے دوچار ہیں اور زيادہ تشویش ناک بات یہ ہے کہ ہمارا معاشرہ کس طرف جارہا ہے ، یہ انتہائی شرم ناک واقعہ ہے ۔

بلاول بھٹو زرداری نے بھی واقعے کو ہر پاکستانی کے لیے باعثِ شرم قرار دیا اور کہا کہ پاکستانی خواتین خود کو غیر محفوظ سمجھ رہی ہیں ، یہ ہماری ذمے داری ہے کہ ہم ان کے تحفظ اور مساوی حقوق کو یقینی بنائیں ۔

Deeply disturbed at the harassment of a young woman & her companions by hundreds of people at Greater Iqbal Park in Lahore. What is more worrying is the direction our society is headed in. The recent anti-women incidents are a reminder that malaise is deep-rooted. Very Shameful!

— Shehbaz Sharif (@CMShehbaz) August 18, 2021

مینار پاکستان پر مجمع کا نوجوان لڑکی سے دست درازی اور زدوکوب کرنا ہر پاکستانی کیلئے باعثِ شرم ہے اور ہمارے سماج کی پستی کو بیان کرتا ہے، ذمے داروں سے انصاف ہونا چاہئیے، پاکستانی خواتین خود کو غیرمحفوظ سمجھ رہی ہیں،یہ ہماری ذمہ داری ہے کہ ہم ان کےتحفظ اورمساوی حقوق کو یقینی بنائیں https://t.co/FnxTpSfkRr

— BilawalBhuttoZardari (@BBhuttoZardari) August 18, 2021

اس کے علاوہ پاکستان علما کونسل کے چیئرمین علامہ طاہر اشرفی نے بھی ملزمان کے خلاف فوری ٹرائل کرکے سرِعام سزا دینے کا مطالبہ کیا ہے۔

 ڈی آئی جی انویسٹی گیشن نے اسپیشل انویسٹی گیشن ٹیم تشکیل دے دی

گریٹر اقبال پارک میں خاتون کو ہراساں کرنے کے معاملے پر ڈی آئی جی انویسٹی گیشن شارق جمال خان کا کہنا ہے کہ اسپیشل انویسٹی گیشن ٹیم تشکیل دے دی گئی ہے جس کی سربراہی ایس ایس پی انویسٹی گیشن لاہورکریں گے۔

ڈی آئی جی انویسٹی گیشن شارق جمال خان نے بتایا کہ اسپیشل انویسٹی گیشن ٹیم 4 سب ٹیموں پر مشتمل ہو گی جن میں انویسٹی گیشن ،فارنزک، ایویڈنس اینڈ ڈیجیٹل میڈیا ٹیم شامل ہوگی۔

شارق جمال نے کہا کہ شہری واقعے میں ملوث افراد کی شناخت کرنے میں پولیس کی مدد کریں جبکہ معلومات شیئر کرنیوالے کا نام صیغہ راز میں رکھا جائے گا۔

انہوں نے کہا کہ تمام ملزمان کو جلد گرفتار کر کے انصاف کے کٹہرے میں لایا جائے گا۔

یاد رہے کہ لاہور میں 14 اگست کو گریٹر اقبال پارک میں اوباش نوجوانوں نے ایک خاتون سے بدتمیزی کی،کپڑے پھاڑ ڈالے اور اسے ہوا میں اچھالتے رہے۔

واقعے کی فوٹیج وائرل ہو نے پر پولیس نے 400 افراد کے خلاف مقدمہ درج کر لیا ہے تاہم اب تک کوئی گرفتاری عمل میں نہیں آئی ہے۔