ترک اداکار انجین التان دوزیتان نے پاکستانی کمپنی کے ساتھ معاہدہ منسوخ کردیا

پاکستان کے سرکاری ٹیلی ویژن پی ٹی وی پر اردو ترجمے میں دکھائے جانے والے مقبول ترین ڈرامہ سیریل ارطغرل غازی کے مرکزی کردار ترک اداکار انجین التان دوزیتان نے اسلام آباد کی نجی ہاؤسنگ سوسائٹی سے برانڈ ایمبیسڈر کا معاہدہ کیا تھا۔

ارطغرل غازی کے مرکزی کردار نے پاکستان کے دارالحکومت اسلام آباد کی نجی ہاؤسنگ سوسائٹی بلیو ورلڈ سٹی کو غیر قانونی قرار دیے جانے کی وجہ سے اپنا معاہدہ منسوخ کردیا ہے، معاہدے کی منسوخی کی تصدیق ترکی کے سرکاری نشریاتی ادارے ٹی آر ٹی کے ذرائع نے کی ہے۔

انجین التان دوزیتان (ارطغرل غازی) کا یارِ من ترکی یوٹیوب چینل کے اینکر ڈاکٹر فرقان حمید سے ٹیلی فون پر گفتگو کرتے ہوئے کہنا تھا کہ معاہدے کے وقت انہیں بلیو ورلڈ سٹی کے بارے میں کوئی زیادہ معلومات حاصل نہیں تھی۔

ٹیلی فون پر گفتگو کرتے ہوئے ترک اداکار انجین التان دوزیتان کا کہنا تھا کہ نجی ہاؤسنگ سوسائٹی سے متعلق پاکستان سے حاصل ہونے والی معلومات کی روشنی اور اس کمپنی سے متعلق اچھی رائے نہ رکھے جانے کی وجہ سے انہوں نے کمپنی کے ساتھ بطور ایمبیسڈر کا کیا ہوا معاہدہ منسوخ کرنے کا فیصلہ کیا ہے۔

خیال رہے کہ کچھ عرصہ قبل نجی ہاؤسنگ سوسائٹی نے فوٹو شیئرنگ ایپ انسٹاگرام پر جاری مختلف پوسٹس میں بتایا تھا کہ انجین التان دوزیتان جلد اسلام آباد میں بلیو ورلڈ میں مسجد کے سنگ بنیاد کی تقریب میں شرکت کریں گے۔