شیخ مشعال الاحمد الصباح کویت کے نئے ولی عہد مقرر

کویت سٹی (دھرتی نیوز)  کویت کے نئے امیر شیخ نواف الاحمد الصباح نے نیشنل گارڈ کے نائب سربراہ شیخ مشعال الاحمد الجابر الصباح کو ملک کا ولی عہد نامزد کردیا۔

امیر کے دفتر سے جاری بیان کے مطابق شیخ مشعال کے انتخاب کوالصباح خاندان کی حمایت حاصل ہے اور اب ملک کی پارلیمنٹ اس کی منظوری دے گی۔

شیخ مشعال الاحمد الجابر الصباح کویت کے نئے امیر شیخ نواف الاحمد الصباح کے بھائی اور دسویں حکمران الصباح خاندان سے تعلق رکھنے والے شیخ احمد الجابر الصباح کے ساتویں بیٹے ہیں، جنہوں نے سال1921سے 1950تک کویت پر حکمرانی کی۔

سال 1960میں شیخ مشال الاحمد نے لندن کے ہینڈن پولیس کالج سے ڈگری حاصل کی اور 2004میں نیشنل گارڈ کا نائب چیف بننے سے پہلے وزارت داخلہ میں اہم عہدوں پر فائز رہے۔

واضح رہے کہ شیخ مشعال الاحمد الجابر الصباح کے بھائی امیر کویت شیخ نواف الاحمد الصباح نے اپنے بڑے بھائی شیخ صباح الاحمد کی وفات کے بعد گزشتہ ہفتے عہدے کا چارج لیا تھا۔

انہوں نے ایک ایسے وقت میں ملک کا اقتدار سنبھالا جب اس کے دو بڑے پڑوسی ممالک سعودی عرب اور ایران کے درمیان شدید کشیدگی پائی جاتی ہے۔

جب کویتی حکومت عالمی مارکیٹ میں خام تیل کی کم ہوتی قیمتوں اور کورونا وائرس کی وبا کے باعث معیشت کو ہونے والے نقصان سے نکلنے کی کوشش کر رہی ہے۔