امریکی صدارتی دوڑ، فلوریڈا اور پنسلوینیا کے نتائج کا انتظار

1 دن پہلے

امریکہ میں صدارتی انتخاب صدر ٹرمپ اور ڈیموکیٹ امیدوار جو بائیڈن کے درمیان کانٹے کا مقابلہ جاری ہے اور تاحال کسی امیدوار کو واضح برتری حاصل نہیں ہو سکی۔

خبر رساں ادارے کے مطابق امریکی صدارتی الیکشن میں ڈیموکریٹ امیدوار جو بائیڈن مشی گن اور وسکانسن ریاستوں میں کامیابی کے بعد وائٹ ہاؤس کے اگلے مکین بننے کے قریب پہنچ چکے ہیں تاہم صدر ٹرمپ کی ٹیم کی جانب سے بعض ریاستوں میں ووٹوں کی گنتی روکنے کا مطالبہ کیا گیا ہے۔

امریکہ کے قومی ٹیلی ویژن پر ایک مختصر خطاب میں جو بائیڈن نے کہا کہ انہوں نے تاحال اپنی جیت کا اعلان نہیں کیا لیکن ‘جیسے ہی ووٹوں کی گنتی مکمل ہوگی، ہمیں یقین ہے کہ ہم ہی کامیاب ہوں گے۔’

صدر ٹرمپ نے اپنی ٹویٹ میں کہا ہے کہ ‘ہمارے وکلا نے بامعنی رسائی کے لیے کہا ہے لیکن اس سے اب کیا فائدہ ہوگا؟ جتنا نقصان

ہمارے نظام کی ساکھ اور صدارتی الیکشن کو پہنچنا تھا وہ ہو چکا۔ بحث اس بات پر ہونی چاہیے۔’

اے ایف پی کے مطابق شمالی ریاستوں مشی گن اور وسکانسن میں کامیابی کے بعد جو بائیڈن کے پاس 264 الیکٹورل ووٹ ہو گئے ہیں جبکہ ڈونلڈ ٹرمپ نے 214 ووٹ حاصل کر رکھے ہیں۔

نواڈا ریاست جہاں کے چھ ووٹ ہیں وہاں بائیڈن معمولی برتری رکھتے ہیں۔ فلوریڈا، جارجیا اور پنسلوینیا کی ریاستوں کے نتائج آنا ابھی باقی ہیں۔

امریکی نشریاتی ادارے کے مطابق کہ جو بائیڈن مطلوبہ 270 الیکٹرول کالج ووٹوں کے قریب پہنچ گئے ہیں اگر وہ نواڈا اور ایریزونا میں کامیابی حاصل کرلیتے ہیں تو انہیں برتری حاصل ہوجائے گی۔