سعودی عرب میں دکانیں لوٹنے والے پاکستانی کا برا انجام

ریاض: سعودی پولیس نے کامیاب کارروائی کرتے ہوئے چوری کے الزام میں 2 افراد کو گرفتار کرلیا۔

عرب میڈیا کی رپورٹ کے مطابق گرفتار ملزمان میں ایک پاکستانی شامل ہے۔ دونوں پر الزام ہے کہ انہوں نے سعودی دارالحکومت ریاض میں کئی دکانوں کا صفایا کیا۔

ریاض پولیس کا کہنا ہے کہ ابتدائی تفتیش کے دوران ملزمان نے اعتراف کیا ہے کہ انہوں نے ریاض کے مختلف علاقوں میں تقریباً آٹھ سے زائد دکانوں کو لوٹا۔ پولیس کی جانب سے خصوصی ٹیم تشکیل دی گئی تھی جس کے باعث یہ گرفتاری عمل میں آئی۔ گرفتار ملزمان کی عمریں 30 اور 40 سال کے درمیان ہے۔

پولیس کا کہنا ہے کہ ان کے قبضے سے وارداتوں میں استعمال ہونے والے اوزار بھی برآمد ہوئے ہیں۔

خیال رہے کہ رواں سال جنوری میں سعودی عرب کی مقامی پولیس نے مختلف گھروں اور دکانوں میں مجموعی طور پر 13 لاکھ ریال کا سامان چوری کرنے والے تین رکنی گروہ کو گرفتار کیا تھا۔

واضح رہے کہ حال ہی میں چوروں نے اے ٹی ایم کو دھماکے سے اڑا کر لاکھوں ریال چوری کرلیے تھے۔