غیر ملکی اہلیہ رکھنے والے سعودی شہریوں کے لیے خوشخبری

ریاض: سعودی حکومت نے فیصلہ کیا ہے کہ سعودی شہریوں کو دی جانے والی حکومتی امداد یعنی گزارہ الاؤنس، مقامی شہریوں کی غیر ملکی اہلیہ کو بھی دیا جائے گا۔

سعودی ویب سائٹ کا کہنا ہے کہ سعودی شہریوں کو ملنے والے گزارہ الاؤنس (سیٹزن اکاؤنٹ پروگرام) سے مقامی شہری کی غیر ملکی اہلیہ اور والدہ بھی مستفید ہو سکتی ہیں۔

مذکورہ محکمے کے ایک اہلکار کا کہنا تھا کہ اگر پروگرام میں بنیادی طور پر رجسٹرڈ سعودی شہری کی والدہ یا اہلیہ غیر ملکی ہیں تو وہ بھی بالواسطہ طور پر منصوبے سے مستفید ہوسکتی ہیں تاہم سعودی شہری کی غیر ملکی اہلیہ یا والدہ براہ راست گزارہ الاؤنس میں رجسٹرنہیں ہوسکتی۔

خیال رہے کہ سعودی عرب میں 3 برس قبل سعودی شہریوں کے لیے مہنگائی الاؤنس کے عنوان سے پروگرام جاری کیا گیا تھا جسے عربی میں ’حساب المواطن‘ کا نام دیا گیا۔

گزارہ یا مہنگائی الاؤنس میں رجسٹریشن کے لیے سعودی شہری ہونا لازمی تھا، غیر ملکی اس پروگرام سے فائدہ نہیں اٹھا سکتے۔

گزارہ الاؤنس کا اصل مقصد ایسے کم آمدنی والے سعودی خاندانوں کو مالی معاونت فراہم کرنا ہے جن کے ذرائع آمدنی محدود ہوں اورانہیں بڑھتی ہوئی مہنگائی سے مالی دشواریوں کا سامنا کرنا پڑ رہا ہو۔

سعودی عرب میں متعدد شہریوں نے غیر ملکی خواتین سے شادیاں کی ہوئی ہیں جن سے ان کی اولادیں بھی ہیں، ایسے شہریوں کا کہنا تھا کہ ہماری اہلیہ اور بچوں کو بھی گزارہ الاؤنس میں رجسٹر کیا جائے تاکہ ان کی بھی مدد ہو سکے۔