نریندر مودی پر تنقید، مزاحیہ تنقیدی شو کو بھارت میں جاری کرنے سے روک دیا گیا

2020-02-26

بھارتی میڈیا تو وزیر اعظم نریندر مودی کی تعریفوں میں مصروف ہے تاہم عالمی مزاحیہ کامیڈی شو ’لاسٹ ویک ٹو نائٹ ود جان اولیور‘ کے شو کو بھارت میں آن لائن ریلیز کرنے سے روک دیا گیا۔

سیاسی مزاحیہ تنقید نگار و کامیڈین جان اولیور کا شو’ لاسٹ ویک ٹو نائٹ‘ کا شمار دنیا کے معروف ترین شوز میں ہوتا ہے۔

مذکورہ شو ویب اسٹریمنگ امریکی چینل ’ایچ بی او‘ پر نشر کیا جاتا ہے تاہم مذکورہ شو کو ڈزنی اسٹوڈیو اپنے ویب اسٹریمنگ چینلز پر بھی ریلیز کرتا ہے۔

’لاسٹ ویک ٹو نائٹ ود جان اولیور‘ کے شوز کو ’ڈزنی‘ اسٹوڈیو ہر ملک میں اپنے مقامی ویب اسٹریمنگ چینلز پرریلیز کرتا ہےرہا ہے اور ماضی میں اس شو کو بھارت میں بھی جاری کیا جاتا رہا ہے۔

تاہم اس شو کی حالیہ قسط کو ڈزنی اسٹوڈیو نے اپنے ویب اسٹریمنگ چینل ’ہاٹ اسٹار‘ پر ریلیز نہیں کیا، جس کی وجہ شاید شو میں نریندر مودی پر تنقید ہے۔

جان اولیور نے 23 فروری کو کیے گئے شو میں امریکی وزیر اعظم ڈونلڈ ٹرمپ کے دورہ بھارت سمیت بھارتی وزیر اعظم کی انتہاپسندی، ہندوستان میں اقلیتوں اور خاص طور پر مسلمانوں پر ڈھائے جانے والے مظالم اور نریندر مودی کی جانب سے ماضی میں ریاست گجرات میں کیے گئے مسلمانوں کے قتل عام پر بات کی تھی۔

جان اولیور کے مذکورہ شو کو اگرچہ محض 3 دن میں یوٹیوب پر 52 لاکھ سے زائد بار دیکھا جا چکا ہے تاہم اس شو کو انڈیا میں ’ہاٹ اسٹار‘ پر ریلیز نہ کیے جانے پر کئی لوگوں نے حیرانگی کا اظہار کیا۔

بھارت کے کئی ٹوئٹر صارفین نے جان اولیور کے تازہ شو کی ویڈیوز شیئر کرتے ہوئے حیرانگی کا اظہار کیا کہ جس شو کو 52 لاکھ سے زائد بار دیکھا جا چکا ہے، اسے انڈیا میں ریلیز کیوں نہیں کیا جا رہا؟

ساتھ ہی کئی افراد نے جان اولیور سے اتفاق کیا کہ بالآخر مغربی میڈیا کو وزیر اعظم نریندر مودی اور ان کی سیاسی جماعت ’بھارتی جنتا پارٹی‘ (بی جے پی) کا نظریہ سمجھ آگیا اور وہ جان گئے کہ دراصل ’بی جے پی‘ نیونازی ہی ہے۔

تاہم چند افراد نے جان اولیور پر تنقید بھی کی اور دعویٰ کیا کہ پروگرام میں بھارت سے متعلق پیش کیے گئے کچھ حقائق غیر حقیقی ہیں اور میزبان نے ریسرچ کیے بغیر کچھ نشریاتی اداروں کی رپورٹس پر اکتفا کیا۔

جان اولیور کے تقریبا 20 منٹ دورانیے کے مزاحیہ کامیڈی تنقیدی پروگرام میں انہیں نہ صرف نریندر مودی بلکہ ڈونلڈ ٹرمپ پر بھی تنقید کرتے ہوئےسنا جا سکتا ہے۔

جان اولیور کا مذکورہ پروگرام ڈونلڈ ٹرمپ کے 24 فروری کو بھارت پہنچنے سے ایک دن قبل نشر کیا گیا تھا، جس میں بتایا گیا تھا کہ حیرانگی کی بات یہ ہے کہ ڈونلڈ ٹرمپ اپنی اہلیہ کے ہمراہ محبت کی نشانی تاج محل کا دورہ بھی کریں گے۔

میزبان نے ہلکے پھلکے انداز میں تنقید کرتےہوئے کہا تھا کہ ’دیکھیں کیا ظلم ہے کہ ڈونلڈ ٹرمپ اور ان کی اہلیہ میلانیا ٹرمپ محبت کی نشانی کا دورہ کریں گے‘