اتوار 19 مئی 2024

لاہورمیں جائیداد کے تنازع پر فائرنگ، باپ بیٹا قتل

لاہورمیں جائیداد کے تنازع پر فائرنگ، باپ بیٹا قتل

لاہور: پنجاب کے دارالحکومت لاہور میں‌ جائیداد کے تنازع پر باپ بیٹے کو فائرنگ کرکے قتل کردیا گیا.

 دھرتی نیوز کے مطابق لاہور کے علاقے تھانہ فیروز والا کی حدود چوکی لبان کے قریب باپ اور بیٹے کو فائرنگ کرکے قتل کردیا گیا، پولیس کا کہنا ہے کہ بھتیجے نے جائیداد کے تنازع پر چچا اور کزن کو قتل کیا.

پولیس کے مطابق بوٹا نامی ملزم کا اپنے کزن مجتبیٰ طارق سے جائیداد کے تنازعے پر جھگڑا ہوا تھا تاہم جھگڑے میں 25 سالہ مجتبی اور 55سالہ طارق جاں بحق ہوئے۔

پولیس کا کہنا ہے کہ دونوں افراد کی لاشوں‌ کو ضابطے کی کارروائی کے لیے تحصیل اسپتال مریدکے منتقل کردیا گیا ہے.

فیروز والا پولیس کا کہنا ہے کہ جائے وقوعہ سے شواہد اکٹھے کرلیے گئے ہیں، ملزم کی تلاش میں‌ چھاپے مارے جارہے ہیں‌، ملزم جلد قانون کی گرفت میں‌ ہوگا.

واضح رہے کہ پنجاب میں جائیداد کے تنازع پر قتل کی وارداتوں میں اضافہ ہوگیا ہے چند روز قبل بھی جائیداد کے تنازع پر بھائی نے سگے بھائی کو قتل کردیا تھا۔

یاد رہے کہ  گزشتہ ماہ بھی لاہور کے علاقے شفیق آباد میں تیس سالہ شہزاد نذیر کو فائرنگ کرکے موت کے گھاٹ اتار دیا گیا تھا۔

پولیس کا کہنا تھا کہ مقتول شہزاد کو اس کے بھائی امتیاز نے مبینہ طور پر قتل کیا ہے، 30 سالہ شہزاد نذیر گھر کی چھت پر سویا ہوا تھا کہ امتیاز نے فائرنگ کرکے اسے قتل کردیا۔

Facebook Comments