ھفتہ 22 جنوری 2022

کسی بھی جگہ کو اسمارٹ ڈسپلے میں بدل دینے والی فیس بک کی انوکھی ڈیوائس

فیس بک کی جانب سے ایک ایسے ویئر ایبل رسٹ سنسر پر کام کیا جارہا ہے جو ایک کلک یا چٹکی بجانے پر آپ کو کسی بھی سطح پر ٹائپ کرنے کی سہولت فراہم کرسکے گا۔

بنیادی طور پر یہ رسٹ بینڈ دماغی سگنلز کو استعمال کرکے اے آر سسٹم سے رابطے میں مدد فراہم کرے گا۔

اس کے لیے ای ایم جی ٹیکنالوجی کا استعمال ہوگاا جو سنسرز استعمال کرکے الیکٹریکل موٹر نرو سگنلز کو کلائی تک پہنچا کر ڈیجیٹل کمانڈ دے گی۔

مثال کے طور پر ہاتھ گھماتے ہوئے اگر صارف کی بورڈ پر ٹائپ کرنے کا سوچتا ہے تو یہ رسٹ بینڈ کسی بھی سطح کو ورچوئل کی بورڈ میں بدل دیتا ہے۔

کمپنی کا کہنا ہے کہ یہ ذہن پڑھنے والی ڈیوائس نہیں بلکہ جب صارف کوئی فیصلہ کرتا ہے تو وہ اس کا اندازہ لگاکر اس کے مطابق کام کرتا ہے۔

فیس بک کا یہ رسٹ بینڈ اگیومینٹڈ رئیلٹی گلاسز سے منسلک ہوگا جو اس وقت تیاری کے مراحل سے گزر رہا ہے جسے رواں سال متعارف کرائے جانے کا امکان ہے۔

اس رسٹ بینڈ کو پہننے والے افراد اپنی انگلیوں کی حرکات کے ذریعے ورچوئل ورلڈ سے بھی رابطے میں رہ سکیں گے۔

یہ بینڈ ہاتھوں کے پیچیدہ اشاروں اور حرکات کو شناخت کرکے ڈسپلے کا مکمل کنٹرول بھی فراہم کرے گا۔

اس ڈیوائس کا ابھی کوئی نام نہیں رکھا گیا اور یہ فیس بک کی جانب سے اگیومینٹڈ رئیلٹی ڈیوائسز کی مارکیٹ میں اہم پیشرفت ثابت ہوگی۔

تمام بڑی ٹیکنالوجی کمپنیاں بشمول ایپل اور گوگل کی جانب سے اپنے اگیومینٹڈ رئیلٹی سسٹمز پر کام کیا جارہا ہے۔

ماہرین کا ماننا ہے کہ اسمارٹ گلاسز بتدریج موبائل فونز کی جگہ لیں گے اور اس طرح کے رسٹ سنسرز اسی سمت کی جانب بڑحائے جانے والا قدم ہے۔

رسٹ بینڈ کمپیوٹنگ اور دیگر فیچرز کا پلیٹ فارم کا کام کرسکے گا اور اسمارٹ گلاسز ڈسپلے کا کام کریں گے۔

فیس بک کی جانب سے جاری بیان میں بتایا گیا کہ ہم اے آر گلاسز کے لیے قدرتی ذرائع پر کام کررہے ہیں کیونکہ ہمارا ماننا ہے کہ اس سے لوگوں کے درمیان رابطوں کا طریقہ کار بدل جائے گا۔

فیس بک کی اے آر ٹیم کے سربراہ اینڈریو بوسورتھ نے بتایا کہ تصور کریں کہ آپ دنیا میں کسی بھی جگہ ٹیلی پورٹ ہوکر پہنچ کر اپنے پیاروں سے اپنے تجربات کو شیئر کریں۔

انہوں نے کہا کہ ایسا اے آر گلاسز سے ہوسکے گا جو حقیقی اور ورچوئل دنیا کو ایسے ملائے گا کہ روزمرہ کی زندگی مزید بہتر ہوجائے گی۔

Facebook Comments