نئی افغان حکومت کو تسلیم کرنے سے متعلق پاکستان نے کیا کہہ دیا؟

اسلام آباد(دھرتی نیوز)افغانستان میں ایک جامع حکومت کے قیام کے لیے حکومت کے عزم کا اعادہ کرتے ہوئے وفاقی کابینہ نے اس امید کا اظہار کیا ہے کہ پڑوسی ملک پر طالبان کے قبضے کے بعد بھارت افغان سرزمین پاکستان کے خلاف استعمال نہیں کر سکے گا۔

  وزیراطلاعات فواد چوہدری نے کابینہ کے بعد کے اجلاس کی پریس کانفرنس میں کہا فضائی راستے افغانستان کو امداد فراہم کرنے کے لیے کھولا گیا ہے۔

 انہوں نے اس امید کا اظہار کیا کہ افغانستان کی ’40 سالہ دکھ بھری کہانی‘ ختم ہو جائے گی اور افغان ’راحت کا سانس‘ لے سکیں گے اور پاکستان ایک مستحکم پڑوسی کے ساتھ اپنے تعلقات کو مضبوط بنانے میں کامیاب ہو جائے گا۔

فواد چوہدری نے کہا کہ ’ہمارے پاس افغان عوام کے لیے ایک پیغام ہے کہ ہم آپ کے امن اور استحکام کے لیے دعا کرتے ہیں اور جو کچھ بھی ممکن ہو وہ کریں گے‘۔

افغانستان میں نئی حکومت کو تسلیم کرنے کے حوالے سے فواد چوہدری نے کہا کہ پاکستان کی پالیسی واضح ہے کہ وہ الگ تھلگ فیصلہ نہیں کرے گی۔

انہوں نے کہا کہ نئی افغان حکومت کو تسلیم کرنے کے فیصلے سے پہلے بین الاقوامی اور علاقائی رویوں پر غور کیا جائے گا۔

افغان بارڈر کے اس پار سے پاک فوج پر حالیہ حملوں کے بارے میں پوچھے جانے پر وزیر اطلاعات نے کہا کہ ایسا نہیں ہے کہ اگلے دن حکومت تبدیل ہونے کے بعد کوئی تبدیلی آئے گی۔

علاوہ ازیں برطانیہ کی ٹریول ریڈ لسٹ میں پاکستان کا نام موجود ہونے سے متعلق سوال کے جواب میں فواد چوہدری نے کہا کہ وزیراعظم عمران خان نے یہ معاملہ اپنے برطانوی ہم منصب بورس جانسن کے ساتھ اٹھایا ہے۔

انہوں نے بتایا کہ برطانیہ کی حکومت کا خیال ہے کہ پاکستان میں کووڈ 19 ٹیسٹنگ میکانزم پر بات چیت کی ضرورت ہے اوروزیر اعظم کے معاون خصوصی برائے صحت ڈاکٹر فیصل سلطان اور برطانیہ کے چیف میڈیکل سائنسدان اس ضمن میں رواں ہفتے تبادلہ خیال کریں گے۔

الیکٹرانک ووٹنگ مشین پر بریفنگ
کابینہ کو الیکٹرانک ووٹنگ مشین (ای وی ایم) کے بارے میں بریفنگ دی گئی اور وزیر اعظم کا موقف تھا کہ ای وی ایم کا استعمال آزاد، منصفانہ اور شفاف انتخابات کے انعقاد کا واحد حل ہے۔

دیگر مسائل پر بات کرتے ہوئے فواد چوہدری نے کہا کہ وزیر اعظم نے وزیر خزانہ شوکت ترین اور وزیر توانائی حماد اظہر کو مائع پٹرولیم گیس سلنڈر کی قیمت میں کمی لانے کا کام سونپا ہے۔

مختلف مسائل پر اجلاس
بعد میں وزیر اعظم خان نے مختلف مسائل پر اجلاسوں کی ایک سیریز کی صدارت کی اور کہا کہ اعلیٰ تعلیم کی سطح پر نوجوانوں کو جدید علوم پڑھانا ترقی اور ترقی کی کلید ہے۔

وزیر اعظم نے اس بات پر زور دیا کہ سلنڈر کی قیمتوں کو نیچے لانے کی ضرورت ہے اور یہ دونوں وزرا اب اس معاملے پر ملیں اور اس کا کوئی حل تجویز کریں۔

علاوہ ازیں بعد میں وزیر اعظم خان نے مختلف مسائل پر تبادلہ خیال کے لیے متعدد اجلاس کی صدارت کی اور کہا کہ اعلیٰ تعلیم کی سطح پر نوجوانوں کو جدید علوم پڑھانا ترقی بہت ضروری ہے۔

اعلیٰ تعلیم کے فروغ کے حوالے سے جائزہ اجلاس کی صدارت کرتے ہوئے وزیراعظم نے کہا کہ وفاقی حکومت اعلیٰ تعلیم کے فروغ کے لیے صوبوں کو ہر ممکن مدد فراہم کرے گی۔

اجلاس کو سیالکوٹ انجینئرنگ یونیورسٹی کے قیام پر پیش رفت سے آگاہ کیا گیا اور قومی اقتصادی کونسل کی ایگزیکٹو کمیٹی نے 16 ارب روپے مالیت کے منصوبے کی منظوری بھی دے دی۔

یہ یونیورسٹی وفاقی اور پنجاب حکومتیں مشترکہ طور پر قائم کریں گی اور آدھی رقم اور زمین صوبائی حکومت فراہم کرے گی۔

اجلاس کو بتایا گیا کہ سیرت النبی ﷺ کو 8 ، 9 اور 10 گریڈ کے نصاب میں شامل کیا جا رہا ہے اور ان کلاسوں کے لیے نیا نصاب جلد شروع کیا جائے گا۔