قائد اعظم کے خواب کی تعبیر کے لئے تمام صوبوں کو ساتھ لے کر چلنا ہوگا،شہباز شریف

کراچی (دھرتی نیوز) مسلم لیگ (ن) کے صدر اور اپوزیشن لیڈر قومی اسمبلی شہباز شریف نے کہا ہے کہ ملک کی ترقی اور قائد اعظم کے خواب کی تعبیر کے لئے تمام صوبوں کو ساتھ لے کر چلنا ہوگا،معاشی ، معاشرتی، سیاسی اور قانونی لحاظ سے صوبوں کے درمیان ہم آہنگی ناگزیر ہے۔

تفصیلا ت کے مطابق اپوزیشن لیڈر شہباز شریف نے بلوچستان عوامی پارٹی (بی اے پی ) کے سربراہ اختر مینگل سے ملاقات کی ہے اور ان کے والد عطااللہ مینگل کی وفات پر تعزیت کا اظہار کیا ۔

اس موقع پر میڈیا سے گفتگو کرتے ہوئے شہباز شریف کا کہنا تھا کہ سردار عطا مینگل کی جمہوریت کے لئے گراں قدر خدمات ہیں جن کا میں عینی شاہد بھی ہوں،آئین کی شق 58ٹوبی کے تحت کئی جمہوری حکومتوں کا بستر گول کیا گیا لیکن 1997میں 58ٹوبی کے خاتمے کے لئے مرحوم سردار عطا اللہ مینگل نے بہت اہم کردار ادا کیا اور اپنے دوستوں کو بھی قائل کیاجو کہ تمام صوبوں کے درمیان ہم آہنگی کی اہم مثال ہے۔

 اپوزیشن لیڈر نے مزید کہا کہ ہمیں تمام صوبوں کا احترام کرنا ہوگا ان کے عوام کو ان کے وسائل پہنچانے ہوں گے، بلوچستان رقبے کے لحاظ سے ملک کاسب بڑا اور آبادی کے لحاظ سے سب سے چھوٹا صوبہ ہے مگر وہاں کی عوام کو پانی سمیت بہت سے مسائل کا سامنا ہے جنہیں دور کرنے کے لئے فوری اقدامات کرنے ہوں گے۔

اس موقع پر اختر مینگل کا کہنا تھا کہ میں اپنی ، اپنے خاندان اور پارٹی کی جانب سے شہباز شریف کی اپنے ساتھیوں کے ہمراہ ہمارے غم میں شریک ہونے اور تعزیت کرنے پر شکریہ ادا کرتاہوں۔