لاہور:فیصل ٹاؤن میں پولیس مقابلہ،2 ڈاکو ہلاک

لاہور: صوبہ پنجاب کے دارالحکومت لاہور میں پولیس مقابلہ ہوا ہے جس کے نتیجے میں دو ڈاکو ہلاک ہوگئے۔

 دھرتی نیوز کی تفصیلات کے مطابق لاہور کے علاقے میں فیصل ٹاؤن میں رات گئے ڈاکو واردات کے لیے منی ایکسچینج کے مالک کےگھر میں گھسے تھے، ڈاکوؤں نے مالک کے بیٹے کو یرغمال بنا لیاتھا۔

پولیس نے بتایا کہ منی ایکسچینج کے مالک کی بیٹی کے واٹس ایپ گروپ پر میسیج پر اہل خانہ نے پولیس کو اطلاع دی۔پولیس جائے وقوعہ پر پہنچی جہاں پولیس اور ڈاکوؤں کے درمیان فائرنگ کا تبادلہ ہوا جس کے نتیجے میں دو ڈاکو ہلاک ہوگئے۔

دوسری جانب لاہور کے علاقے قائداعظم انڈسڑیل اسٹیٹ میں ڈکیتی کے دوران مزاحمت پر 2 موٹرسائیکل سوار ملزمان کی فائرنگ سے ایک شخص جاں بحق ہوگیا۔

پولیس حکام کا کہنا تھا کہ ملزمان مقتول کا موبائل فون،پرس اور نقدی لوٹ کر فرار ہوگئے۔

یاد رہے کہ رواں سال 2 مئی کو لاہور کے علاقے کاہنہ میں مبینہ پولیس مقابلے میں کانسٹیبل کے قتل میں ملوث 2 ملزمان ہلاک ہوگئے تھے۔