کراچی میں پلاٹ کے تنازع پرعورت نے خاتون پر تیزاب پھینک دیا

کراچی: شہر قائد میں پلاٹ کے تنازع پر عورت نے دوسری خاتون پر تیزاب پھینک دیا۔

 دھرتی نیوز کی رپورٹ کے مطابق کراچی کے علاقے ملیر میں پلاٹ کے تنازع پر عورت نے دوسری خاتون پر تیزاب پھینک دیا، 55 سالہ خاتون تیزاب سے بری طرح جھلس گئیں۔

ذرائع کے مطابق تیزاب گردی کا واقعہ چار روز قبل لاشاری گوٹھ ملیر میں یش آیا۔ پولیس نے مقدمہ درج کرکے واقعے کی تحقیقات کا آغاز کردیا ہے۔

متاثرہ خاتون کا کہنا ہے کہ تیزاب پھینکنے کے بعد مجھے ہی ڈرایا اور دھمکایا جارہا ہے، پلاٹ کے تنازع پر بات چیت کے لیے گئی تھی، ملزمہ نے تیزاب پھینک دیا۔

متاثرہ خاتون نے آئی جی سندھ، ایڈیشنل آئی جی سے واقعے کا نوٹس لے کر انصاف کی فراہمی کا مطالبہ کیا ہے۔

ادھر کراچی کے علاقے اورنگی ٹاؤن میں گھر سے تین بچوں کی ماں کی تشدد زدہ لاش برآمد ہوئی ہے، پولیس کا کہنا ہے کہ خاتون کا شوہر پراسرار طور پر فرار ہے۔

پولیس کا کہنا ہے کہ خاتون کی لاش کمرے میں پڑی تھی، پیٹ پر تیز دھار آلے کے وار کے نشانات تھے، پولیس گھر پہنچی تو مقتولہ کے تین بچے گھر میں موجود تھے اور بھوکے پیاسے تھے۔

پولیس کے مطابق شبہ ہے کہ شوہر اہلیہ کو قتل کرکے فرار ہوگیا ہے، مقتولہ کے بھائی اور والد نے بھی اسحاق پر شبہ ظاہر کیا ہے۔

دوسری جانب سرجانی ٹاؤن کے ڈی اے فلیٹس میں آتشزدگی کے نتیجے میں جھلس کر 4 افراد زخمی ہوگئے، ریسکیو ذرائع کے مطابق آگ گیس لیکیج کے باعث لگی، زخمیوں میں خاتون اور بچہ بھی شامل ہیں، زخمیوں کو طبی امداد کے لیے اسپتال منتقل کردیا گیا ہے۔