فریال محمود نے شوہر سے علیحدگی کی خبروں پر خاموشی توڑ دی

رواں برس مئی میں کورونا وائرس کی وبا کے باعث نافذ لاک ڈاؤن کے دوران اداکارہ فریال محمود اور دانیال راحیل نے سادگی سے شادی کرلی تھی۔

گزشتہ دنوں سوشل میڈیا پر افواہیں زیر گردش تھیں کہ فریال محمود اور دانیال راحیل نے ایک دوسرے سے علیحدگی اختیار کرلی ہے۔

سوشل میڈیا پر یہ دعویٰ بھی سامنے آیا تھا کہ فریال محمود اوردانیال راحیل نے فوٹو شیئرنگ ایپ انسٹاگرام پر ایک دوسرے کو اَن فالو کردیا ہے۔

علاوہ ازیں یہ دعویٰ بھی کیا گیا تھا کہ اداکارہ نے انسٹاگرام سے اپنے شوہر کے ساتھ پوسٹ کی گئی تصاویر بھی ہٹادیں۔

اب اداکارہ فریال محمود نے شوہر سے علیحدگی سے متعلق افواہوں کی تردید کردی ہے۔

فریال محمود نے انسٹاگرام پر ایک اسٹوری شیئر کرتے ہوئے لکھا کہ میں سوشل میڈیا پر مجھ سے متعلق اور میرے شوہر سے علیحدگی کے حوالے سے پوسٹس دیکھ رہی ہوں۔

انہوں نے لکھا کہ میں باقاعدگی سے اپنے شوہر کے ساتھ تصاویر پوسٹ نہیں کرتی تو اس کا یہ مطلب نہیں کہ ہمارے درمیان جھگڑے چل رہے ہیں۔

اداکارہ نے کہا کہ ہم نے ایک دوسرے کے ساتھ وقت گزارنے کا انتخاب کیا نہ کہ یہ ہم آپ لوگوں کو ثابت کرتے رہیں کہ ہماری شادی چل رہی ہے۔

انہوں نے کہا وہ اور ان کے شوہر دونوں ہی مشکل وقت سے گزر رہے ہیں اور اپنے کام کے شیڈول کی وجہ سے گزشتہ 5 ماہ سے وہ ایک دوسرے سے بہت کم مل پائے ہیں۔

اداکارہ نے لکھا کہ میں یہ چاہوں گی کہ آپ لوگ میری شادی مجھ پر اور دانیال راحیل پر چھوڑ دیں اور ان معاملات پر توجہ دیں جو آپ کی زندگی میں اہمیت رکھتے ہیں۔

علاوہ ازیں انہوں نے اپنی طلاق کی افواہ پھیلانے والے سوشل میڈیا اکاؤنٹ پر برہمی کا اظہار بھی کیا۔