زلزلے کے بعد گلگت بلتستان میں بند ہونے والی سڑکوں کا اب کیا حال ہے؟

گزشتہ روز اسلام آباد سمیت ملک کے مختلف شہروں میں آنے والے 6 اعشاریہ 4 شدت کے زلزلے کے بعد گلگت بلتستان میں بند ہونے والی سڑکوں کو ٹریفک کے لیے بحال کر دیا گیا۔

ترجمان این ڈی ایم اے کا کہنا ہے کہ زلزلے کے بعد گلگت بلتستان میں شنگس اور حسن آباد میں بند ہونے والی سڑکیں ٹریفک کے لیے بحال کر دی گئی ہیں۔

این ڈی ایم اے کے ترجمان کا کہنا ہے کہ صورتحال پر نظر رکھے ہوئے ہیں اور تمام پی ڈی ایم ایز کے ساتھ رابطے میں ہیں جبکہ این ڈی ایم اے کی ایمرجنسی سروس الرٹ ہے۔

خیال رہے کہ گزشتہ رات 10 بجے کے قریب وفاقی دارالحکومت اسلام آباد سمیت ملک کے مختلف شہروں میں 6 اعشاریہ 4 شدت کا زلزلہ محسوس کیا گیا تھا، زلزلہ اس قدر شدید تھا کہ لوگ خوف و ہراس کے باعث گھروں سے باہر نکل آئے تھے اور کلمہ طیبہ کا ورد شروع کر دیا تھا۔